CCLXVI.

1376, September 9. Frankenstein.

Derselbe bezeugt, dass Heinzko Betsch auf alle Rechte in Baitzen verzichtet hat.

In nomine domini amen. Nos Potha de Sczastolowicz, maiestate imperiali et regia invictissimi Wenceslai regis Romanorum et Bohemie capitaneus in Frankensteyn, universis tenore presencium potituris recognoscimus publice profitentes, quod ad nostram venit presenciam nobilis vir Heynczko Beczow suo suorum heredum legittimorum nomine, non coaetus nec deceptus aut ductus per errorem, sed tam in mente, quam in corpore bene sanus, habita prius secum et cum amicis suis matura deliberacione, de consilio eorundem amicorum suorum bona et libera voluntate rite et rationabiliter et expresse coram nobis et consulibus civitatis Frankinsteyn, qui pro tunc fuerunt, et coram Arnoldo de Petirswalde iudice curie et notario nostro in castro civitatis prenotate, nomine testamenti renuncciavit omni iuri, impeticioni, arestacioni, repeticioni, que vel quas in villa Byczan sive in bonis ville predicte ex materna devolucione estimative se habere videbatur vel habere posset quomodolibet infuturum cum hoc promittens, data sua fide et sine dolo, domino Petro de Rychinbach abbati et suo conventui seu monasterio in Kamencz astare et suffragari perhenniter racione dictorum bonorum in Byczan contra quemlibet arrestantem, impetentem vel aliquod ius in predictis bonis in Byczan habere se dicentem omni quo vivit tempore incunctanter. Nos vero ad utriusque partis votivam supplicacionem predictam resignacionem coram nobis, et consulibus civitatis Frankinsteyn et Arnoldo de Petirswalde iudice curie et notario nostro ita racionabiliter et voluntarie factam, gratam et ratam habere volentes, ipsam presentis scripti patrocinio approbamus, ratificamus et perhenniter auctoritate, qua fungimur, confirmamus. In cuius rei certitudinem firmiorem presentes desuper dari et scribi iussimus litteras nostri capitaneatus sigillo ad causas una cum sigillo civitatis Frankinsteyn appensione roboratas. Datum Frankinsteyn feria tercia post festum nativitatis beate virginis Marie, anno domini millesimo trecentesimo septuagesimo sexto, presentibus hiis testibus videlicet: domino Paskone de Girsekewicz milite, Vincencio fratre suo, fratre Nicolao de Paczkow priore in Camencz et fratre Johanne advocato monasterii supradicti ceterisque quam pluribus viris fide dignis.

Or. Perg. An einem Pergamentstreifen das hauptmannschaftliche S.; dasjenige der Stadt Frankenstein ist von der Urkunde losgeschnitten und fehlt.

Codex Diplomaticus Silesiae, hrsg vom Vereine für Geschichte und Alterthum Schlesiens, Bd 10, Urkunden des Kloster Kamenz. Hrsg von Dr Paul Pfotenhauer, Breslau 1881.